本周日，白云区横滘等地举办划龙舟活动，场面非常热闹。
阿六讲：广州嘅扒龙舟活动有唔少特点，比如形式上有“趁景”同“斗标”两种，仪式上有“起龙”、“请神”等，呢啲，相信好多人都听讲过，不过，就地区而言，大家又知唔知，广州边度嘅扒龙舟先至最传统、最粤味呢？
回答呢个问题好简单，就系地名有个“滘”字嘅地方。
点解会咁讲呢？我哋不妨先从呢个“滘”字讲起。
滘：粤语读“gaau3”，系广东一个地方方言，原意系指水相通嘅地方。
广州嘅地理特点就系水道多，特别系喺郊区，各种河涌纵横交错，好多地方都系“水相通”，因此以“滘”做名嘅地方就宁舍多，求其数一下：海珠区后滘村、沥滘村、新滘村；白云区横滘村、沙滘村；荔湾区滘口村、茶滘村；番禺区上滘村、厦滘村、沙滘村。
上述呢啲“滘”素有“开门见水，举步登舟”嘅特点，传统上一直就有扒龙舟嘅习俗同底蕴，扒龙舟可以讲系佢哋嘅文化强项，唔少“滘”仲因扒龙舟而出名，比如，番禺区沙滘中学就被定为广东省首个“龙舟传承基地”。
每年嘅六七月都系广州雨水最多嘅月份，又系龙舟节月份，因此呢个时候有个“滘”字嘅地方就宁舍热闹，因为嗰度紧有龙舟睇。
